Thursday, February 1, 2007

فرح محمد صيام

This was written on 27/1/2007
امبارح كان فرح محمد صيام
و حضرت الفرح
و طول الفرح عمالة أقول لنفسي
طول عمري موش باحب بعض حاجات في الأفراح
الزفة الطويلة..و اصرار الدي جي على ان العروسين يرقصوا..و الصوت العالي
لكن امبارح بس..كل الحاجات اللي كنت باعتبرها سطحية كانت في منتهى الجمال
و أنا كنت في منتهى السعادة و عمالة أبتسم و أضحك من غير ما أقدر أوقف نفسي
و لما حللت الموقف لعناصره الأساسية (زي ما بتوع نظم بيحبوا يعملوا) لقيت ان ده صيام
ده فرح صيام..و فرح رشا..توأم روحه
فعلا كانت السعادة مالية الجو..و الاتنين ما كانوش خايفين انهم يعلنوا سعادتهم ببعض
ما كانش في التصنع اللي بشوفه في معظم الأفراح
كانوا الاتنين بيقولوا للدنيا كلها احنا موش خايفين منك لاننا مع بعض
ولان حوالينا ناس فعلا بتحبنا
ناس فعلا فرحانة بينا من غير مجاملة
و لولا الملامة كنت رقصت من الفرحة اللي كانت مسيطرة على الجو
كانت الناس فعلا موش عاوزة تمشي
و كانت الناس عاوزة تعمل أي حاجة عشان تبين فرحتها
كل الحاجات اللي دايما بتتعمل في الأفراح و باعتبرها روتين كان لها شكل تاني و طعم تاني
لان روح صيام و رشا كانت طاغية عليها فخلتها جديدة و جميلة
و كنت حاسة ان صيام و رشا حطوا بصماتهم الجميلة على كل حاجة في الفرح
حتى الأغاني اللي ماباحبهاش
الروح الحلوة دي ماحسيتهاش قبل كده غير في مناقشة أميرة
و ده دليل على ان الناس اللي روحهم حلوة و ضميرهم صافي ربنا بيكرمهم في فرحتهم قوي بناس فعلا بتعزهم
و الاعزاز أحلى من المحبة لان فيه احترام و اكبار للشخص
أميرة كانت تستاهل في مناقشتها
و صيام كان يستاهل في فرحه
عقبال كل أفراحهم و أفراح الناس اللي بعزهم تكون جميلة كده و أجمل كمان من كده
مبرووووووووووووووووووووووووووووووووووووووووووووووووووووووووووووووووووووك لصيام و رشا
و يارب من قلبي تكون أيامهم كلها سعادة و فرح زي امبارح
و عقبال كل الناس
تكون أفراحها جميلة زي فرحهم

No comments:

Template by:
Free Blog Templates